26.11.2018

Гажано нылпиос, Вавож ёросысь школаосысь визь люкасьёс!

Туэ Алабгоын бадӟым конференцие люкаськем азьветлӥсьёс, кенешемзы бере, резолюциязы пыртӥзы: удмурт кыллэсь нуналзэ одно ик ортчытоно шуыса. Сое 27 шуркынмонэ ортчытоно кариськизы, малы ке шуоно 27 ноябре 2001-тӥ аре кутэмын вал «Удмурт Элькунысь кун кылъёс» нимо кат. Со катъя, удмурт кыллы Удмуртиын кун статус сётэмын. Та кун статус удмурт кыл понна Удмуртиын тужгес но йӧноез мар ке – со удмурт кылэз мер улонын, кун удысын, дышетонын но мукет удысъёсын уже кутонлы инъет кылдытӥз. Бöрысь со Удмурт кыллэн дунневыл нуналэз нимаськиз, малы ке шуоно удмуртъёс быдэс дунне вылын уло.

Соин валче, ми дэмласьком тӥледлы, 5-11 классъёсын дышетскисьёслы , дышетӥсьёслы но визьнодасьёслы, «Жингрес, мусо но дуно удмурт кылмы» ёрос веб-квестэ пыриськыса, ас кылдэс тодэмдэс, гажамдэс но яратэмдэс возьматыны . Татчы пыриськыны ас кожады яке туркымен быгатӥськоды. Бырйыны луоз тужгес кельшем заданиез яке ваньзэ быдэстыны. Ас нимъёстэс таблицае, отчы ик дышетсконнидэс но класстэс пусъе. Заданиосты быдэстыса, гожтэ со сярысь таблицае яке ссылка пуктэ.

Ужрад одӥг нунал ӵоже, 27.11.2018, 8 часысен 23 часозь кыстӥськоз. Арня пумозь вормисьёс тодмо луозы: тужгес шаплыосыз но удмурт кылэз ӟеч тодӥсьёсыз вормись нимен пусъемын луозы.

Озьыен, азьлань!

1. Удмурт кыллэн дунневыл нуналэзлы открытка

Пöртэм программаосты кутыса, кылдытэ та темая открытка, мылкыд каремдыя ӟечкылан ватсалэ, суред форматэн сохранить каре но будэтэ та борддоре https://padlet.com/olgalesnikova2013/bfsxsl5roqpc. (нимдэс таблицае пыртэ, ужды бордын но эн вунэтэ пуктыны)

2. QR-код сьöры ватскм визьмо верамъёс

QR-кодъёс пöлысь огзэ быръе но валэктон шедьтэ. Со понна сое компьютерады яке смартфонады кыске, суред кадь сохранить каре.

1) 2)

QR-кодэз лыдӟон вылысь, соосты лыдӟон программаез шедьтэ яке татчы вазиське: https://zxing.org/w/decode.jspx .

Валэктонъёстэс келялэ татчы: https://docs.google.com/forms/d/1495aIizL5exEvnMSAaUH0UsLkGjbhtGFS7xi08MWmUo/edit

Уждэс быдэстэм сярысь валтӥсь таблицае «быдэстэмын» кылын пусъе.

3. Удмурт кыл, вордскем кыл, анай кыл сярысь кылбуръёс Татчы https://padlet.com/olgalesnikova2013/f44ccm478vrt удмурт кыл яке вордскем кыл, анай кыл сярысь кылбуръёсты интыялэ. Сак кариське: соос кöня ке пол медаз пумиське. Эн вунэтэ авторлэсь нимзэ гожтыны. Уждэс быдэстэмды сярысь таблицае «быдэстэмын» кылын пусъе.

4. Удмурт писательлы сӥзем плэйкаст

Ёросысьтымы одӥг удмурт писательлы сӥзем плэйкаст кылдытэ. Плэйкастэз лэсьтыны луэ пöртэм сервисъёсын, тани одӥгез соос полысь: http://www.playcast.ru/

Ссылказэ таблицае пуктыны эн вунэтэ.

Тодады вайытӥськом таӵе дано нимъёсты: Кузебай Герд, Т. И. Шмаков, А.Н. Клабуков, Ф.Г. Александров, И.А. Зорин, П.М. Чайников, В.Е. Смирнов, М. А. Чайников, А. Югов, С.В. Матвеев. Ужды кудзылы ке огзылы мед луоз сӥземын.

5. Визьсынан

Макем ӟеч удмурт кылэз тодэмдэс быгатӥськоды возьматыны татын: https://docs.google.com/forms/d/e/1FAIpQLSd1m5i6dDBm-GcoP6QvzBrRAGXA381w7PO2VJ3MbADbwKbqQQ/viewform

Вань юанъёсъя жингыртоно Лесникова Ольга Владимировналы 89042471524 телефонъя


Возврат к списку